havana malala rehetra ao amin’ny Tompo,

‘Hampitomboina ho anareo anie ny fahasoavana sy ny fiadanana amin’ny fahalalana tsara an’Andriamanitra  sy Jesosy Tompontsika.’ (2 Pet. 1:2)

Izany fiarahaban’ny apostoly Petera ireo mpino Kristiana tany Asia Minora fahizay izany, no entinay koa iarahabana anareo mpiara-miasa rehetra mitsidika isam-potoana ity blaogy ity.

Nambaranay tao amin’ny ‘rindrina’ mialoha ity (NY ZAVA-KENDRENA AMIN’NY JOBILY FAHA 70 TAONA – Fandaminana samihafa), fa horaisinay an-tanan-droa izay rehetra mety azonao handraisana anjara (notsindriana manokana tamin’izany ireo hoenti-manana samihafa, na ara-pitaovana na ara-bola) amin’ny fanatanterahana ireo ezaka maro samihafa izay hanamarihana izao taon-Jobily izao.

Hahazoanao mandinika sy manapa-kevitra ny amin’izay heverinao atolotra amin’izany ary, dia fifaliana ho anay ny mandefa ny antsipiriany  tsara ho fantatra ny amin’ireo ezaka ireo. Endrika roa no entinay hampahafantarana anao izany : sary sy teti-bola samihafa. Manasa anao hanokatra ireo ‘documents’ ireo.

Ireo sary vitsivitsy ireo dia maneho ny ‘Tsangambaton’ny Jobily’, trano vaovao natao ‘haharitra’ (‘en dur’), izay kasaintsika haorina ao Ankaramalaza, ho solon’ny tranohazo miorina manoloana ny trano Fiangonana ankehitriny, nisy ny toerana izay nonenan’ny Raiamandrenintsika Mama Volahavana Germaine mialoha ny nahalasanany tamin’ny Janoary 1998. Anisan’ireo fotodrafitr’asa hajoro ho vavolombelon’ny asa lehibe izay nataon’Andriamanitra, ary mbola ataony sy tohizany, ao Ankaramalaza izany, ho an’ny taranaka rehetra mifandimby amin’ny ho avy. Efitrano maromaro no handrafitra ny trano izay hisy rihana iray : efitra lehibe iray hatao ‘Musee’, efitra fivoriana vitsivitsy, ary efitrano fandraisam-bahiny maromaro.

Ireo tabilao vitsivitsy izay nampiarahinay amin’ny sary kosa dia maneho ny Teti-bola tandrify  ireto manaraka ireto :

-          ireo fanamboarana (‘Rehabilitation’) izay tokony hotanterahintsika amin’ity taona ity, mba hahatomombana ny fandraisana ny Fivoriana ao Ankaramalaza (26 Jolay – 2 Aogositra 2011), izay ho ivon’ny Jobily rahateo; tsindriana manokana ny maha-zava-dehibe ny asa fanamboarana mba ialana amin’ny fanaovana ‘investissement’ isan-taona

-          ny trano lehibe, ‘Tsangambaton’ny Jobily’, araka izay nambara teo ambony

-          ireo hoenti-manana ny amin’ny hamoahana ireo mari-pahatsiarovana samihafa (bloc-notes, sns.)

-          ireo fandaniana samihafa izay tsy maintsy hatrehintsika amin’ny fanomanana sy ny fanatanterahana ny fankalazana izao Jobily izao

Ho anao izay maniry hanolotra fitaovana mivantana, dia manasa anao izahay hijery manokana ireo tabilao maneho izany (‘Travaux de Rehabilitation’ sy ‘Tsangambaton’ny Jobily’).

Teny tsy zoviana amintsika Fifohazana intsony ny fananarana izay nentin’ny apostoly Paoly namporisika ireo Kristiana fahizay tany Efesosy, ao amin’ny Efesiana 5:14 : ‘Mifohaza hianao izay matory, ary mitsangana amin’ny maty, dia hampahazava anao Kristy’. Ao anatin’ny kontekstan’ izany teny izany ihany no ilazany koa hoe : ‘Hararaoty ny andro azo anaovan-tsoa, fa ratsy izao fiainana izao’ (Efesiana 5:16).

Izao Taon-Jobily izao dia fotoana manokana tokoa azontsika hanaovan-tsoa, hanohanana izao asa lehibe izay naorin’Andriamanitra tamin’ny alalan’ny Raiamandrenintsika Mama Volahavana Germaine izao; samy hanararaotra anie isika, isam-batan’olona, isam-pianakaviana, isam-tsampana ao amin’ny Fiangonana, isam-pikambanana mpanohana an’Ankaramalaza, isan’andiam-panokanana ny mpiandry, isam-piangonana, eny, isika rehetra izay mitonona ho zanaky ny Fifohazana tsy ankanavaka, zanak’Ankaramalaza, monina eto Madagasikara na any ivelany.

Anterina eto am-pamaranana ny Kaonty manokana any amin’ny Banky, misokatra ho an’ny rehetra, azontsika handrotsahana ny fanomezantsika ho amin’izao Jobily izao.

Compte bancaire: BMOI – Agence Siège Antaninarenina

Intitulé: Tobilehibe Ankaramalaza  -  Jobily faha-70 Taona

RIB: 00004  00001  07082000259 32

IBAN: MG46 0000  4000  0107  0820  0025  932

http://ankaramalaza.wordpress.com