HAFATRA PASTORALY AVY AMIN’NY FILOHAN’NY FPMA

NOHO NY PASKA 2011

Ho aminareo anie ny fahasoavana sy ny fiadanana avy amin’I Jesoa Kristy, Ilay Vavolombelona mahatoky, Ilay Zanaka Lahimatoa sady voalohany natsangana ho velona avy tamin’ny maty, ary Ilay Filohan’ny mpanjaka amin’ny tany.

Hafatra faharoa ampitaiko aminareo ity, ry havana, taorian’ny Synoda Lehibe nataontsika tany La Rochette tamin’ny volana novambra lasa teo. Ao anatin’ny vanim-potoana fanamafisana orina isika FPMA ankehitriny.

Miroso isika amin’ny fanatsarana ny Fitsipika Anatiny sy ny Lalàna fototra (Statuts) mifehy ny FPMA. Misaotra sy mankasitraka ireo manam-pahaizana manokana (Experts) sy ireo olom-boafidy nirahin’ny Faritany (Commission Ad hoc) miasa tsy tapaka mandrafitra izany mba hotapahin’ny Synoda Lehibe manaraka ho raikitra. Kanefa, tsy ny lalàna sy ny Fitsipika no zava-dehibe, fa ny Fanahy enti-miatrika izany. «Tsy misy nofo hohamarinina amin’ny lalàna eo anatrehan’Andriamanitra ; fa ny lalàna ino ahazoana ny fahalalana marina ny amin’ny ota», hoy ny apostoly Paoly (Romanina 3, 20). Hanampy antsika hiorina tsara ireo, fa ambony kokoa ny fiainam-panahy sy ny fiorenan’ny finoantsika amin’i Jesoa Kristy Lohan’ny Fiangonana.

Andriamanitra velona no tompointsika sy inoantsika, fa tsy Andriamanitra maty. Hoy ny hafatry ny apostoly, hoe : «Raha tsy nitsangana velona i Kristy dia tsy misy fotony izay torinay, ary tsy misy fotony izay inoanareo.» I Kôrintianina 15, 14. Moa tsaroantsika FPMA eo amin’ny fiainan’ny Tafo tsirairay, ny Faritany tsirairay, ny Foibe ve izany ? Betsaka ny zava-manahirana atrehintsika, kanefa matoky sy manana fanantenana isika fa tsy maintsy ho mpandresy, noho Ilay Tompontsika efa Mpandresy talohantsika. «Amin’izany rehetra izany anefa, dia efa mpandresy tanteraka isika amin’ny alalan’Ilay tia antsika.» Romanina 8, 37. Manainga mandrakariva sy mampahery anareo àry izahay, mba tsy ho kivy sy hifanilika andraikitra, na hifampitsaratsara foana, fa tsy hohamaivanintsika kosa ny fiainam-panahy, ny fianam-bavaka, ny fiombonana sy fifikirana amin’ny fandalinana ny Tenin’Andriamanitra. Atreho, araka izay azo atao, ny fiofanana atolotray Birao Foibe, sy ny Soritrasam-piangonana (SAP) ary ny Projet Laïc ho antsika.

Mampahatsiaro anareo sy mampiomana amin’ireo Fotoan-dehibe iraisantsika vahoakan’ny FPMA amin’ity taona ity : Ny Isantaonan’ny Sampana Tily hatao any Parigne l’Eveque ny 30 aprily-01 mey, ny Fiofanan’ny Filoha sy ny Mpitahiry vola hatao eto Paris ny 21 mey, ny Fihaonamben’ny Sampana Sekoly Alahady hatao any Mejannes-le-Clap ny 02-04 jona, ny Fihaonamben’ny Sampana Tanora Kristiana (STK) hatao any Strasbourg ny 01-04 jolay, ny Isantaonan’ny Sampana Fifohazana ny 06-14 jolay, ny Zaikabe nasionaly hatao any Rouen ny 29-30-31 oktobra.

Manonona ny Fiadanan’ny Tompontsika Jesoa Kristy ho aminareo tsirairay avy ary mitsodrano anareo rehetra samy hanao Paska sambatra. «Andriamanitra diia efa nitondra an’i Jesoa Tompontsika hiala amin’ny fahafatesana,i Jesoa Tompontsika Izay Mpiandry lehibe miahy ny ondry noho ny ra nafoiny ho antoky ny Fanekempihavanana mandrakizay. Andriamanitra Loharanon’ny fiadanana anie hahatonga anareo ho vonon-kanao ny asa soa rehetra hahatanterahanareo ny sitrapony; ka hataony ao anatintsika amin’ny alalan’I Jesoa Kristy anie izay sitrany. Ho an’I Jesoa kristy anie ny voninahitra mandrakizay mandrakizay! Amena.» Hebreo 13, 20-

Ny Filohan’ny FPMA

Rev.Dr Jean A. RAVALITERA

Paris, 31 mars 2011