Tsy fahafirin’izay efa niteny sy nanan-kambara momba ny ray aman-dreny Kardinaly Armand Gaëtan RAZAFINDRATANDRA, nandao antsika tsy ela akory izay, aho. Kanefa ny niarahako niasa taminy akaiky nandritra ny naha-Tonian’ny FFKM aho, tamin’ny 1993 ka hatramin’ny 2000, dia tsy mamela ahy hangina tsy hilaza fohy ireto zavatra ireto izay nampisongadina tao amin’ity ray aman-dreny ity , ohatra velona momba ny atao hoe ezaka ekiomenika, iantsoan’ny Tompo antsika.

Ny atao hoe ezaka ekiomenika mantsy dia tsy adihevitra na fandalinana ihany, fa vavaka sy fihetsika ary toe-tsaina indrindra koa.

Nandritra ny naha-Eveken’i Mahajanga azy, nanomboka ny Avrily 1978, dia nampiavaka azy manokana ireto fihetsika aman-toetra ireto : tena nazoto nitsidika faritany izy. Somary lava dingana izay moa izy, ka nazoto nandeha an-tongotra, ary tsy nampiahotra azy ny nandeha lakana. Nomen’ny faritany anarana hoe Baba izy. Ny atao hoe Baba any amin’ny faritry ny Sakalava dia ray aman-drenin’ny rehetra, manaja azy na ny Kristiana, na ny mpanompo sampy aza. Ary ity no tena zava-dehibe : rehefa mitsidika faritany ka tonga amin’ny tanàna izy, dia tsy ny Kristiana Katolika ihany no vangiany sy mandray azy, fa ny Kristiana hafa koa , dia ny Protestanta samihafa, satria, hoy izy, samy mila hery ireny. Ny ataony amin’izany dia ny miresadresaka mankahery an’ireo hazoto amin’ny finoany avy, fa tsy mitaona an’ireo ho lasa katolika velively akory. Tena fihetsika ekiomenika maha-te hidera tokoa izany !

Raha feno folo taona no nitsidihan’ny Papa Joany Paoly faharoa an’i Madagasikara ( 1989), dia izy, izay voatendry ho Kardinaly, nanomboka ny Febroary 1994, no nangataka ny Papa, hanasa ny Filoham-piangonana tao amin’ny FFKM, hitsidika ny Papa tao Vatican. Ka dia voaasa tany Vatican ary nivahiny tany nandritra ny folo andro, ny Filoham-piangonana telo mirahalahy, miampy azy rahateo. Ireto ny Filoham-piangonana tamin’izany : Sa Grâce Rémi Joseph RABENIRINA, Filohan’ny EEM, sy Ramatoa vadiny, Pastora Benjamin RABENOROLAHY, Filohan’ny FLM, sy Ramatoa vadiny, Ny Mpitandrina Edmond RAZAFIMAHEFA, sy Ramatoa vadiny. Dia izy mihitsy no tonga tao amin’ny biraon’ny FFKM, niteny tamin’ny Tonian’ny FFKM hoe “Fa angaha moa mandeha ny FFKM raha tsy ao ianao, Tonia, koa andeha karakarao ny pasipaoronareo mivady ho any Roma isika hitsidika ny Papa”. Izany no nahatonga anay mivady ho anisan’ireo nitsidika ny Papa tany Vatican, ka nihaona taminy izahay, ny 19 jona 1999. Tsy lazaina intsony ny hatsaran’ny fandraisana anay sy ny fanomezana avy amin’ny Papa ary ny dinidinika nifanaovana tamin’ireo tompon’andraikitry ny fifandraisam-piangonana samihafa avy amin’ny fitondrana tao Vatican. Marihina fa niantohana tanteraka ny saran-dàlana mandroso sy miverina ary ny fiananay tany Roma.

Moa tsy fihetsika ekiomenika lehibe manokatra ho amin’ny fifankahalalan’ny samy Kristiana ve izany ?

Tamin’izany fitsidihanay izany koa no nitondran’ny Kardinaly Armand RAZAFINDRATANDRA anay, hitsidika ilay Katedraly nanendrena azy ho Kardinaly Pretra dia ny katedraly Ss. Silvestro e Martino ai Monti, ao Roma. Ny Kardinaly rehetra mantsy dia manana katedraly iandraiketany manokana ao Roma. Nampihetsipo ny fanompoam-pivavahana fohy nataonay niaraka, ka izahay mpitondra fivavahana dia samy nanao ny akanjom-panompoana.

Fa tsy fifandraisana amin’ny fara-tampony tahaka izany ihany no nokarakarain’ny Kardinaly Armand RAZAFINDRATANDRA fa ny fifandraisana eo amin’ny ambaratongan’ny samy Fiangonana sy samy mpanompo na dia samy hafa finoana koa aza.

Raha vao tonga kelikely teto La Réunion aho, tamin’ny 2001, dia notongavan’ny vehivavy lehibe mpiray trano taminay, nanontany hoe : “Ianao ve Tompoko, no Pasteur Josoa Rakotonirainy ? Fa mitady anao amin’ny telefaonina ny avy any amin’ny Eveché ?” Rehefa noraisiko ny telefaonina dia ny Kardinaly Armand RAZAFINDRATANDRA no niteny tamiko : “Mandalo eto aho ka tsara raha mihaona isika”. Dia natao ny fotoana nihaonana, ka ny Eveka Katolikan’ny Ranomasimbe Indiana rehetra, no tonga nihaonako sy nanasa ahy hiara-misakafo tamin’izy rehetra. Tamin’izay no nifankahalalako voalohany tamin’ny Evekan’i La Réunion, Mgr Gilbert AUBRY. Ny fifandraisana amin’io ray aman-dreny lehibe io no ananan’ny FPMA La Réunion tombony amin’ny zavatra rehetra.

Isaky ny mandalo eto La Réunion ny Kardinaly Armand RAZAFINDRATANDRA dia tsy manadino ny miantso anay ary efa niantrano tato aminay mivady izy, niara-nisakafo taminay tamin’ny Mey 2006.

Porofon’ny fahatsorampony izany ary fanomezany lanja ny fifandraisan’ny samy olona, samy Malagasy, samy Kristiana, na dia samy manana ny finoany aza.

“Mba ho iray ihany izy rehetra” (Joany 17:21).

Io no tarigetran’ny Kardinaly Armand RAZAFINDRATANDRA. Mandra-pahatanterak’izany, mivavaka isika ary manaiky hanao ny ezaka ekiomenika, amin’ny alalan’ny fihetsika sy ny toe-tsaina misokatra, tahaka izay nananan’ny Kardinaly Armand RAZAFINDRATANDRA. Ho voninahitr’Andriamanitra anie ny fiainan’ny mpanompony.

Pasteur Josoa RAKOTONIRAINY

Mpitandrina FPMA La Réunion

Tonia FFKM (1993-2000)