Ry havana malala,teny nalaina tao amin'ny filazantsara nosoratan'i Lioka 2.22c ary ao antin'ny teny izay volamina horenesitsika anio. Mbola ao anatin’ny vanim-potoana fanhatsiarovana ny nahaterahan’i Jesosy Zaza isika izao. Izany moa dia nanomboka tamin’ny Noely na Krismasy. Fotoana izay nankalazain’ny fianakaviana ny fahatongavan’ity Zaza ity tao an-tokan-tranon’i Josefa sy Maria ary natrehin’ireto mpiandry ondry. Taorian’izany dia nitatra ny mpamangy ka olona hafa firenena no tonga namangy satria nahita ny kintan’ilay Zaza, tany amin’ny faritra onenany dia any Antsinana (Orient) izay lazain’izy ireo fa mpanjakan’ny Jiosy. Ary dia fantantsika fa na dia ny lapan’ny fanjakan’i Heroda azy dia mba nandrekoa izany vaovao izay aminy tsy mahafaly azy fa heveriny fa hanozongozona ny fiandriananay. Izany famangianireto Magy na olokendry ireto izany no lazaina fa nampisehoana an’i Jesosy tamin’ny tsy Jiosy/jentilisa. Lazaina hoe Epifania izany. Izany Epifania izany no mbola tohizantsika amin’ity anio ity ny fankalazana azy.

Izany fanakalzana izany dia rentsika, arak’izay novakiantsika teo, dia ny asan’i Jaona Mpanao batisa.

Fa inona tokoa moa no nataon’i Jaona ?

Lazain’i Lioka eto fa :

* Tiberio Kaisara, mpanjakana ary amin’ny faha 15 taonan’ny nanjakany izy

* Pontio Pilato no Governora tany Jodia

* Heroda no mpanapaka

Ireo no marika ara-tantara apetrak’i Lioka fa nandritr’io vanim-potoana io no nananovan’i Jaona ny asany. Raha filazantsara norenesintsika izao dia :

Jaona mpitory, Jaona Mpampianatra/Mpananatra ary Jaona Mpanao batisa no hitantsika.
Jaona nitory tamin’ny tany rehetra any amoron’i Jordana ny batisan’ny fibebahana ho famelan-kelona. Jaona mitaona ny olona hamboatra ny lalan’i Jehovah : lala-mahitsy, tsy miolakolaka. Fivam-po izany raha adika tsotra. Miala amin’ny lalana izay alehanao fa miova lalan-kafa. Hitantsika izany tamin’ireto Magy, rehefa avy nihaona tamin’i Tompo dia notoroan’ny anjely lalan-kafa fa tsy hiverina amin’i Heroda. Miova lalana, miova fiainana izay lazaina fa fahateraham-baovao indray izay rehetra nihaona tamin’i Tompo.

Tamin’ny vanim-potoana niandrasana ny fahatongavan’i Jesosy, izany hoe tamin’ny advento raha adika amin’ny vanin’andro dia tamin’ny 13 desambra 2009 lasa teo dia efa niresaka momba an’ity asan’i Jaona ity isika. Noresahina tamin’izany ny fanontaniana izay napetraky ny : vahoaka, mpamory hetra,ary ny miaramila tamin’i Jaona manao hoe : Inona no hataonay ? (Lk 3.10,12,14).

Tsy tany amoron’i Jordana ihany i Jaona no niasa fa tonga hatra ny amin’ny lapam-panjakan’i Heroda izy nohon’ny fitondran-tenan’ity mpanapaka ity. Tantarain’i Lioka fa nanambady an’i Herodiasy ny vadin-drahalahiny izy. Lazain’ireo mpandinika maro fa vady navela’i Filipo izay tsy hafa fa zanak’i Heroda Lehibe ity Herodiasy ity. Hitan’i Jaona fa tsy mety izany dia nanarin’i Jaona i Heroda. Jaona miditra hatramin’ny atao hoe etika na fitondran-tena. Lalana mety andalovana tokoa ny resaka etika toy ny fanambadiana, ny famadihana sns.... Ankoatr’ity resaka Herodiasy ity dia mbola misy ratsy (20) hafa nataon’i Heroda.

Ny vokatr’izany dia nitondra an’i Jaona, mpanao batisa ho any amin’ny toeran-kafa dia ny tranomaizina i Heroda. I Heroda mety nieritreritra fa vita hatreo ny amin’i Jaona Mpanao batisa kanefa ny Tompo mampiasa izany ho fahasoavana ho an’ireo olon any antranomaizina ahazoan’izy ireo koa mandray ny teny izay zarain’i Jaona. I Lioka dia tsy mitantara ny vokatr’izany fandalovan’i Jaona tany an-tranomaizina izany. Ny azo lazaina dia betska koa anefa ny olona miaina ao an-tranomaizina na dia tsy any aza. Manidy tena amin’ny zavatra maro hany ka tsy tafavoaka irery fa tsy maintsy misy mpamoaka ary izany no antony koa itenenan’ireo olona nahatsiaro tena ka nanotany an’i Jaona hoe Inonaz no hataonay ?

Mipetraka amintsika rehetra koa ny fanotaniana hoe : sao dia mbola any antranomaizina ary izaho ity ? Inona no mbola mamatotra ahy ? Hevero ary manontania tena ?

Anisan’ny asa izay nataon’iJaona indray dia ny fampianarana. Toy ny milaza i Lioka eto fa i Jaona dia mahalala izay sain’ireto olona miandry azy ireto (15) ka ametrahan’izy ireto fanotaniana hoe Ity ve no Kristy sa tsia ? Dia namaly i Jaona fa ny asany dia ny fanaovana batisa amin’ny rano fa avy Izay mahery noho izy. Izy indray dia hanao batisa amin’ny Fanahy Masina sy ny afo. Fampianarana fampidirana ny amin’i Jesosy izay lazaina fa Kristy. Tsy mbola hitan’ny olona eto jesosy fa Jaona no mampianatra. Manana fahefana hamaky izay sain’ny olona ny mpampianatra. Io fehefana io anefa dia omen’ny Fanahy azy amin’ny fotoana fa tsy fahefana mitoetra maharitra afa-tsy ireo izay manana fanomezam-pahasoavana manoka momba izany. Koa tandremo izay atao, izay heverintsika izay saintsaitsika fa tsy misy azo afenina fa misy Fanahy asina afaka mamaky izay saininao . Mety zavatra ny miangona isika fa tsy tena mahalala hoe inona marina tokoa moa no mahatonga ahy ho aty am-piangonana.

Eto Jaona dia milaza momba ny tenany; Tsy manonona velively ilay teny hoe KRISTY izy fa lazainy kosa fa Mahery noho izy. Mizara ny hevitr’ireo mpandinika moba an’ity anarana ity. Toy ny hoe : misy ambaratonga telo : Jaona, Mahery (puissant) ary ny Mahery lavitra (plus puissant). Jaona manamafy izany fa nadia ny hanatona azy eny ny hikasika ny tongony amin’ny alalan’ny fanalana ny fehikapany aza dia tsy azony atao.

Jaona manao batisa : Batisa izay tsy hafa akory fa vokatry ny fanampaha-kevitra momba ny fiovam-po ao anaty. Lazain’i Jaona koa fa na dia mitovitovy ny asa izay ataon’izy ireo : ny batisa izany dia voafetra kosa ny an’i Jaona : Batisa amin’ny rano ho amin’ny fibebahana ihany. Fa Izy (Jesosy) kosa hanao batisa anareo amin’ny Fanahy sy ny Afo. Amafisin’i Jaona izany amin’ny fankana ohatra ny amin’ny hampisarahana vary (izay mitondra vokatry ny fibebahana oharina amin’ny vary izany eto) ary koa ny mololo. Iretsy voalohany : ny vary izany dia vokatry ny Fanahy ka fanomezana maokana avy amin’i Jesosy : mila mitondra voa ny kristiana : vary. Fa izay vokatra hafa toy ny mololo kosa dia hodorana amin’ny afo. Jereo ny and 9. Tsy afo fandiovana akory fa afo fandevonana. Anjarantsiaka no misafidy izay vokatra entintsika : Vary sa mololo ?

Fa iza ary ity Jesosy ?

Raha izao fitantaran’i Lioka azy izao dia olona tahaka ny olona rehetra ity Jesosy ity. Lazainy fa natao batisa izy. Tsy mba nanotany tahaka an’ireto vahoaka, mpamory hetra, ary miaramila ny amin’izay tokony hataony Izy fa nivavaka kosa. Niresaka tamin’ny Rainy Izy ary izay dia hamafin’izay zava-niseho :

* nisokatra ny lanitra.

* Ny Fanahy Masina nidina teo amboniny miendrika voromailala

* Nisy feo avy tany an-danitra.

Eto no ampisehoana amin’ny vahoka rehetra izay nanatrika ny amin’ity Jesosy ity : Zanak’Andriamanitra Izy. Raha ny anjely no niteny tamin’ireo mpiandry ondry, ny kintana no nampisehoana izany tamin’ireto olon-kendry avy tany Antsinanana, eto kosa dia amin’ny alalan’ny batisa no isehoan’i Jesosy. Eto isika dia mahita zava-baovao hafa indray.

Lazaina i Jesosy dia tsy hafa fa Andriamanitra nitafy nofo tahaka antsika olombelona, nanaiky ny hatao batisa eny hatramin’ny fahafatesana azy. Eto indray isika dia mahita ny Fanahy masina mandray endrikin’ny voromailala. Tsy fantantsika izay tarehin’ny Fanahy Masina fa matetika ny vokatry ny Fanahy no hitantsika sy sapantsika. Eto anefa dia andray ny endriky ny voromailala Izy. Nandritry ny vavaka nataon’i jesosy no nidinan’izany Fanahy izany teo amboniny. Fanahy izay mitoetra ao aminy. Toy ny ataobatisa amin’ny Fanahy Izy. Maro no milaza fa eto no ahitana ny Andriamanitra Ray izay miteny, ny Zanaka izay aseho amin’ny olombelona dia Jesosy izany ary ny Fanahy Masina aso toy ny voromailala. Nomena anarana Jesosy eto : Zanako Malala. Ity izany no izay Zanak’Andrimanitra tonga nofo ka aseho amin’ny vahoaka ary tamin’i Jaona koa.

Izany no ampisehoana aminao koa amin’ity anio ity fa Jesosy Kristy dia Zanak’Andriamanitra. Jesosy izay ankasitrahan’ny Rainy. Jesosy lazain’i Jaona Mpanao batisa fa Mahery lavitra noho izy, Jesosy izay manao batisa amin’ny Fanahy Masina sy ny Afo.

Raiso toy ny sary ao antsaina ny asan’ireo mpamboly izay mampisaraka ny voa amin’ny tahony toy ny hazo na ny mololo.Tian’ny Tompo hodioviny tsara ianao izay maheno izao teny izao tahaka hitondra voa toy ny vary izay tena fantantsika malagasy fa fototsakafon-tsika.

Enga anie isika rehetra, amin’ity taona 2010 ity mba hitondra vokatra toy ny vary ho entitsika mamelona ny tenantsika aloha, hamelona ireo mpiray tanidrazana amintsika eto Dijon, Bourgogne, sy ny manodidina. Aza hadinoina koa fa manana adidy amin’ny mpiara-monina amintsika isika dia ny frantsay sy ireo hafa firenena.

Voninahitra anie ho an’Andriamanitra Ray sy Zanaka ary Fanahy Masina, izay hatramin’ny taloha indrindra ka ho mandrakizay. Amen

D.ANDRIANARIVO, mpitandrina FPMA DIjon
10 janoary 2010