Firy taona izy teo
kanefa ange jereo
fa mihamikororoso
na zara fa mandroso
'zato firenena
efa mivena ?

Firy taona izy teo
ka ahoana no tsy leo
fa tsisy fiovana
na fahagagana,
n'aiza n'aiza
ange, sakaiza ?

Firy taona izy teo
fa tsy nahenoana feo,
na kely akory
ny tsy hatory
ho an'ny osa
toa miavosa ?

Firy taona izy teo,
nisy niantso hoe : vonjeo
kanefa dia tsy hita
rehefa mba tafita
na hoe voafidy
fa toa nandidy ?

Firy taona izy teo
no nibaiko hoe : poteho
ka tsy mahavariana
raha ny fijaliana
no mandresy
sy misesy ?

Fredy JAOFERA
http://www.haisoratra.org