...mba hamoazanareo be ka ho tonga mpianatro hianareo Jao 15.8

Mitohy hatrany ny fihainoantsika ny teny izay voalaza ao amin’ny Asa, ny I Jao ary ny Jaona. Izany moa dia mikasika indrindra ny fotoana taorian’ny nitsanganan’i Jesosy Tompo tamin’ny maty. Alahady faha 5 taorian’ny Pasaka isika izao. Fotoana izay nametrahany hafatra farany ho an’ireto mpianany na dia izany aza dia niteny izy tenany mihitsy fa tsy hilaza zavatra maro aminareo intsony aho Jao 14.30a.

Ny hafatra izay horaisintsika amin’ity anio ity dia ny hoe hamaozanareo be ka ho tonga mpianatro hianareo (izany hoe ny mpianatra izany).

Ny hoe vokatra ! Tsy hianareo eto Dijon no hampianarina ny amin’ny voaloboka sy ny sampany. Fantatra fa ny zavamaniory, rehefa avy nandalo ny ririninna dia manomboka velombolo ka mamololona. Miakatra ny tsiron-kazo ka mamelona ny tsirin-kazo mitondra azy hamelana ka hitondra voa. Tamin’ny hariny ho an’izay naheno tamin’ny radio na ny television dia naheno ny amin’ny mpiandry tsara. Izany moa dia manamafy amitsika ny maha mpamboly sy mpiompy ny zanak’Isiraely tamin’ny andron’i Jesosy. Mazava rahateo moa fa tsy mbola nisy ireo teknolojia maro samihafa toy ny electronika, ny hery amam-baratra sy ny sns tamin’izany andro izany. Ny fambolena sy ny fiompiana no nahavantana ny taranak’i Abrahama.

Eto ary isika , indrindra fa ny filazzantsara dia milaza ny amin’ny voaloboka sy ny mpaboly azy Jesosy. Ny voaloboka dia Izy tenany : “Izaho no tena voaloboka’ ary ny mpamboly sy mpikarakara izany voaloboka izany dia ny Rainy : “ny raiko no mpamboatra”. Fanamarihana voalohany dia ny teny hoe “tena” (véritable na vrai) voaloboka. Nahoana ny mpamboatra no tsy misy an’io teny hoe “tena” io. Satria tsy misy mpamboly hafa fa ny vokatra kosa no mety ho samihafa. Ao izany ny voaloboka ary misy ny tena voaloboka.

Ny firafitry ny teny eto dia manambara amintsika an’izany : ny misarika ny saina eto dia ny fitantaran’i Jaona ny amin’ny tsy famoazanan’ny sampana. Nahoana ny sampana no tsy mamoa satria misy antony ao. Ny tsy famoazan’ny voaloboka no resahina sy tsindrina eto. Andrimanitra anefa tia ny vahoakany. Ny bokin’ Isaia 5 dia manohatra ny fifandraisan’Israely sy Jehovah toy ny tanimboaloboka sy ny mpikarakara azy. Lazainy amin’izany ny fahasahiranana aterak’izany fikarakarana tanimboaloboka izany :
* ny fiasana izany, ny fanesorana ny vato (5.2),
* ny fambolena karazam-bolaloboka tsara (5.3)
* ny fananganana tilikambo eo afovoan’ny saha
* ny fandavahana famiazam-boaloboka

Ny tanjona dia ny fanantenana voa tsara kanjo namoa voalobo-dratsy .

Mbola azontsika tohizana ny famakiana ny bokin’Isaia faha 5. Teny izay fantatr’ireto mpianatra ireto izany bokin’Isaia izany. Ny fifandraisana eo amin’i Jehovah sy ny vahoakany dia iharina amin’izany tanimboaloboka sy ny mpamboatra azy izany. Eto dia Jesosy no mampihantra izany amin’Izy sy ny Rainy. Ary satria ny fifandraisana mivantana amin’i Jehovah sy ny olony tsy namokatra dia manolotra lalam-pifandraisana hafa Jesosy dia ny fandalovana aminy na ny ny firaisana aminy (Jao 15.4). Izany firaisana amin’i Jesosy izany indrindra fa ny fitoerana amin’izany fifandraisana izany no hahatonga an’ireto mpianatra ireto hamoa voa tsara.

Inona ary no tsiron’io voa io ? Ny teny izay novakiantsika tao amin’ny epistilyI Jao dia milaza amintsika ny amin’izay tokony ho fiainantsika:
* tsy ho tia amin’ny ny teny sy ny lela (I Jao 3.18a)
* fa tia amin’ny asa sy ny marina (I Jao 3.18b)

Betsaka tokoa no miteny fa tia kanefa hafa no asehony amin’ny fiainany. Eto i Jaona, apostoly izay lazaina koa fa mpianatra tian’i Jesosy indrindra dia mampianatra ny amin’izay tokony hifankatiavan’ireto mpianatra. Jesosy dia nampihantra izany teo amin’ny fiainany. Raha tena mitoetra marina ao amin’i Jesosy Kristy isika dia miaina toa Azy koa. Ary raha miaina toa Azy dia manao izay nataony koa eny hatramin’ny fanolorana ny tena hamonjy ny hafa aza. Tsy misy fitiavana lehibe toy izao dia ny manolotra ny ainy hamonjy ny sakaizany.. Io fitiavana io sy ny finoana an’i Jesosy Kristy no lazain’i Jaona apostoly eto fa didin’Andriamanitra.

Misy zavatra roa izay tsy azo sarahina eto dia
* ny finoana an’i Jesosy Kristy : io ilay lalana izay nolazaitsika teo fa tsy maintsy andalovana satria tsy mahavita tena isika
* sy ny fifankatiavana eo amin’ny samy mpianatra tahaka izay nandidiany antsika : fifandraisana eo amin’ny samy olombelona voavonjy. Io fifankatiavana io dia vokatry ny Fanahy Izay nomen’i Jesosy ny mpianatra taloha ary taorian’ny nandehanany.

Io fifankatiavana io no tsiron’ny voa izay asehon’ireto mpianatra ireto ka hitaona ireo olona hino fa Jesosy Kristy tokoa ny mpamonjy. Io fifankatiavana io dia tsy hafa akory fa endriky ny fifandraisan’i Jesosy sy ny rainy ihany. Eto no ahatsapan’ny olona fa Andrimanitra dia lehibe lavitra nohon’ny fony. Didiy izay tsy hafa akory fa manamafy an’ilay voalaza hoe tiava an’i Jehovah Andriamanitrao ary koa ny fitiavana ny namana. Ka arakarakin’ny fiainanao no ahafantaran’ny olona fa mpianatry ny Tompo ianao na tsia. Betsaka no afaka miteny hoe tia fa vitsy kosa no mampiseho izany amin’ny fiainany. Izany no tsiron’ny voaloboka izay entinao.

Fa teo amin’ny mpianatra , mba ahoana no fisehon’izany ? Ny teny voalohany tao amin’ny asan’ny apostoly dia mampiseho amintsika an’ity mpanenjika ny fivavahana kristiana ity ka lasa nitondra vokatra mitovy amin’ny mpianatra. Vokatry ny fifankatiavana dia lasa niray tamin’ny mpianatra tany Damaskosy ity lehilahy ity dia i Saoly izany. Saoly mpanenjika lasa mitory fa Jesosy dia Zanak’Andriamanitra. Tamin’ny voalohany dia nisy tokoa ny tahotra na tany Damaskosy izany na tany Jerosalema koa satria fanta-daza ny nataon’ity lehilahy ity. Kanefa dia nisy izay mpianatra nalefan’Andriamanitra ho mpanelanelana/mpandray (accueil) :
* tany Damaskosy dia i Ananiasy no nirahin’ny Tompo handray an’i Saoly ka hitondra azy eo amin’ny fifankatiavan’ny mpianatra.

* Tany Jerosalema indray dia i Barnabasy (izay azo adika hoe zanaky ny fananarana) izay nantsoina koa hoe Josefa. Lehilahy avy tamin’ny taranak’i Levy ary teraka tany Kyprosy (Asa 4.36) izay nitondra ny fananany rehetra teo an-tongotry ny apostoly .

Izany lehilahy Barnabasy izany no nitondra an’i Saoly teo amin’ny Apostoly ka nijoro vavolombelona fa tena nandray ny famonjena tokoa i Saoly ka sahy nitory ny anaran’i Jesosy tany Damaskosy.

Miditra amin’ny fotoana vaovao indray izao ny finoana kristiana. Teo aloha dia i Petera sy Jaona no hita matetika mitory ny anaran’i Jesosy Kristy. Izao indray dia i Saoly no mitory izany ary niady hevitra tamin’ny helenista (jiosy miteny grika). Saoly izay tsy an’isan’ny Apostoly indray ity no mitory ny filazantsara. Ary dia izany no iainantsika amin’izao fotoana izao. Isika rehetra dia samy nihaona tamin’i Jesosy tahaka an’ity Saoly ity. Nisy koa olona izay nandray antsika tsirairay avy teto amin’ny Fiangonana izay nisy antsika tany. Ary dia izany no vokatra entintsika tsirairay avy ary dia mbola miaina ny fifankatiavana isika indrindra fa ny firaisana ary ny fitoerana eo amin’i Jesosy.

Ry havana, vokatr’izany rehetra izany teo amin’ny fiangonana dia,
* ny fiadanana, ny fandrosoana
* ny fandehanana amin’ny fahatahorana ny Tompo
* ny famporisihan’ny Fanahy

Nihamaro tokoa ny Fiangonana ka betsaka no nanatona ny Apostoly sy ny mpianatra. Anisan’ny fomba amam-panaon’ireto mpianatra ireto ny fiarahana misaka ka ihinana ny mofo ary ny fisotroana ny divay tahaka izao ataontsika androany izao. Ny Tompo no manasa anao hihaona aminy aloha ary hiaraka latabatra aminy rahefa avy eo.

Voninahitra anie ho an’Andriamanitra Ray sy Zanaka ary Fanahy Masina, izay hatramin’ny taloha indrindra ka ho mandrakizay. Amen

FPMA Dijon,
10 may 2009