.raha misy tia Ahy, dia hitandrina ny teniko izy Jao 16:23
Faly miarahaba antsika amin’izao alahady alahady faha 5 aorian'ny paska izao. Ankalazaintsika miaraka amin'ny STK eto amin'ny fiangonana. Teny sarotra satria manambara zavatra roa lehibe dia ny atao hoe fitiavana ary koa ny teny. Ny voakasik'izany indray dia “ raha misy olona” ary koa ny hoe Ahy. Izany hoe ny fifandraisan'i Jesosy sy izay milaza ny ho tia Azy.

Eto amin'ity Jaona faha 14 ny Tompo dia efa mahafantatra fa tsy ho ela akory dia hifarana ny fotoana iainany ety an-tany. Eo am-pankalazany ny fetin'ny Pasaka izay ahatsiarovan'ny Jiosy ny fialany tamin'ny fandevozana tany an'efitra Izy. Hita tamin'izany :

- ny nanasan'i Jesosy ny tongotry ny mpianany toko 13

- ny nannodroan'i Jesosy izay hamadika Azy dia Jodasy Iskariota izany (13.21)

- ny nilazan'i Jesosa ny hialany tety an-tany (13.33)

- ny nanomezan'i Jesosy didy vaovao ho an'ireto mpianany : ny fifankatiavana (13.34)

- ny tokony hinoan'ireto mpianatra ireto an'i Jesosy (14.11)

Eto Izy dia mamerina ilay resaka fitiavana. Mamitina Jesosy ny amin'izay tokony ho fizotry ny fiainantsika

Raha misy olona tia ahy, dia hitandrina ny teniko izy; ary ny raiko dia ho tia azy, ary ho ao aminy izahay ka honina ao aminy.Io fitiavana io no voalohany. Raha misy ny fitiavana dia tsy maintsy misy ny tiavina. Io fitiavana io no mampifandray anao amin'ny hafa. Ahoana ny ifandraisanao amin'ny hafa ? Ny fitiavana. Misy milaza fa ny lalàna satria io no mandrindra ny fiarahanao miaina amin'ny hafa. Ny lalàna no manome to-ro lalana amin'izay azoanao atao. Ny didy folo koa dia tahaka izany. Mamaritra ny fifandraisan-tsika amin'Andriamanitra ary amin-tsika samy olona. Andriamanitra dia Andriamanitry ny filaminana fa tsy ny fikotranana. Atorony avokoa izay tokony ho fiainantsika ebny hatamin'izay eritreretina ho kely aza toy ny fomba fiakanjo (Levitikosy ...). Ny Didy folo dia milaza amintsika izay tokony hifandraisantsika amin'Andriamanitra (6) ary 4 ny fifandraisantsika samy olona.

Amin'ny and 13.34 Jesosy dia manome didy vaovao : Didy vaovao no omeko anareo, tahaka ny nitiavako anareo no aoka kosa mba hifankatiavanareo. Didy izay mamerina izay voalaza ao amin'ny Lev 19.18 aza mamaly ratsy na manao lolompo amin'izay iray firenena aminao: fa tiava ny namanao tahaka ny tenanao : Izaho no Jehovah. Io fitiavana io no tokony hananantsika : ny tena fitiavana dia manolotra ny ainy ho an'ny sakaizany. Fa toy izao no nitivan'Andriamanitra izao tontolo izao. Nomeny ny Zananilahy tokana...(3.16). Ny mariky ny fitiavana dia ny fanomezana. Ohatra ny Zanaka Lahitokan'Andriamanitra, fanomezana ny ainy ho an'ny hafa, sns.

Eto izany fitiavana izany dia aseho amin'ny alalan'ny fitandremana ny teniny. Miaraka eto ny hoe fitiavana/fitandremana, Izany dia efa hitantsika tamin'ny and 14. 15;21;27; Ireto mpianatra ireto dia mahalala tsara ny lalana satria jiosy izy ireo ary koa mahafantatra ny tenin'i Jesosy satria mpianany ary niara-nipetraka taminy, nampianariny, nahita ny asany sns.. Azo ampifandraisana eto ny teny sy ny didy na ny lalana.

Fa ny teny anefa raha ny filazantsara nosoratan'i Jaona dia manana ny dikany manokana koa dia ny

- 1.1 : Ary tamin'ny voalohany ny Teny, ary ny Teny tao amin'Andriamanitra, ary ny Teny dia Andriamanitra.

- 1.14 : Ary ny Teny dia tonga nofo ka nonina tamintsika

Jesosy io teny io. Ny fitandremana ny Teniny no anehoana ny fanajana Azy, ny fanatanterahana izay voalazany : iraka izany, fampianarana izany sns...

Izany fanehoana ny Teniny izany no atao koa hoe : fijoroana vavolombelona. Io no tena mampiavaka ny olona tsirairay avy. Tsy dia ny fitenenanao hoe izaho toy izao na izahay dia toy izao fa ny fihetsikao, ny toetranao, ny fiteninao, ny fiakanjonao sns..

Vokatr'izany:

Ny Raiko ho tia azy.ary hankao aminy izahay ka honina ao aminy.

Miova ny toe-javatra. Raha tamin'ny andron'ny TT dia nolazaina fa Andriamanitra tamintsika (Dieu avec nous), ao amin'ny filazantsara : Andriamanitra eto amintsika (Dieu parmi nous), ankehitriny dia azo lazaina hoe Andriamanitra ao amintsika (Dieu en nous). Andriamanitra sy Jesosy monina ao anatinao. Zava-dehibe izany ary izany no iarahantsika amin'ny mpanao Salamo hoe : 66 izay novakintsika teo. Vita ny fihavanana. Isika tia Azy ary izy tia antsika. Marika lehibe ahitana ny fitiavan'Andriamanitra ny fonenany ao antintsika. Lasa tempolin'Andriamanitra velona no sady mandehandeha isika. Tsy isika intsony no mankany amin'ny Tempoly toy ny fanaon'ireto Jiosy fa ny tenantsika no fonenan'Andriamanitra.Ary satria tempoly ny tenantsika dia izany hoe efa natokany sy nohamasininy mba honenan 'Andriamanitra izany.

Tsy ianao intsony no manjaka fa ilay monina ao aminao ka nanoloranao ny tenanao no aoka hanjaka. Ary io ilay fitiavana noresahintsika tamin'ny voalohany. Ny fitiavana an'i Kristy dia ny famelana Azy hanjaka eo amin'ny fiainantsika, ho tompon'ny fiainantsika tanteraka.

Koa raha toa ka tsy mbola niditra tamin'izany lafiny izany ianao dia fotoana mety hanaovana izany izao miantso anao ny Tompo satria te-honina ao aminao. Te-hiditra ao amin'ny fiainanao Izy. Ekeo Izy ho tompon'ny fiainanao. Izany akory tsy midika hoe hiala amin'ny fianaranao na amin'ny asanao ianao. Fa ny dikanty dia hoe avalao hiditra sy hanjaka amin'ny fiainanao Jesosy.

Ny tian'i Jesosy havela ho anao dia ny fiadanany izay tsy hain'izao tontolo izao raisina na omena. Io no tena mampiavaka ny kristiana amin'ny olona rehetra : ny fiadanan'i Kristy. Io fiadanana io no adika amin’ny teny hebreo hoe Salema. Koa raha ny tenantsika no toerana ipetrahan’izany salema izany dia tsy hafa akory fa izy no tanana Jero misy an’ilay salema dia ilay Jerosalema vaovao izany.Jerosalema vaovao izay ipetrahan’ny fitiavan’Andriamanitra no mitandrina ny teniny koa.

Voninahitra ho an'andriamanitra Ray sy Zanaka ary Fanahy Masina

Amena.